كلمات اغاني محمود عبد العزيز

استعرض الموضوع السابق استعرض الموضوع التالي اذهب الى الأسفل

كلمات اغاني محمود عبد العزيز

مُساهمة  همسة في الثلاثاء يناير 11, 2011 12:30 pm

كلمات البوم خلي باك

خــلي بالك

خلي بالك لي إيدي وقت اسالمك لما يازولتي البريدك
أمسح من الزمن العداوة واقول بريدك
تفرح الناس الحزينة والأسف الكان مدينة
تهدمو الريدة الحنينة
إنت وأنا من فوق على قمماً سعيدة
نخلي صوتنا دوام يغني
ياصوتنا غني باللهفة والحب والتمني
لاسهاد في ليل بعاند لا الوجع تاني بعاود
بس تغني نهدم الخسران ونبني بالوهج عالم مغني


النهايات

النهايات التفتش في عيونك للبداية
والبنيات البغنن في عمر حاضن الشكاية
والدريبات واقفة تايهة ماشة منك ومرة جاية
بس غنى الوتر البيلهي حس نغيمات الغلابة
هو البياخد من ملامحك نغمة من طبلة وربابة
يصنعوا اللحن البيدوي يجمعوا الأرض والسحابة
نخلة تاخد من ملامحك فرحة النيل في التعابة
طفلة تلعب بين دموعو كايسة لي حرف الكتابة
النهايات التفتش في عيونك للبداية
والبنيات البغنن في عمر حاضن الشكاية
والدريبات واقفة تايهة ماشة منك ومرة جاية
بس غنى الوتر البيلهي حس نغيمات الغلابة
هو اللي ثابت فينا منك هو اللي ساكن في الحنايا
النهايات التفتش في عيونك للبداية

قربــك

قربك بفرحني بعدك بجرحني
حبك بسمحني صدك بقمحني
إن شاء الله دايم لي قربك وحبك لي
إن شاء الله لينا تدوم المودة والريدة
ننسى السهر والنوم نحضن أغاريدا
ننسج سوا الأحلام نتفانى شوق وهيام
وهواك يحلق بي وارعاك بضي عيني
الله العليم بالريد جافانا صداً ليه
قسمة ما بالأيد وهواك هد الحيل
وهواك شال البال ياغاية الآمال
سآل الكريم الحي يحميك ويلطف بي
مالينا غير الريد غير الهوى الغلاب
غير رحمتك يالسيد يامجمع الألباب
يجمعنا رغم البين ونعيش سوا الإتنين
أرضيك وتبسم لي يالبي هواك أنا حي

لماردتـــك

لما ردتك كنت عارفك زي نغيمة هاربة من وتر الأسية
كنت شايفك زي نجيمة ضاوية في الفجج القصية
كنت حابسك زي دميعة خوفي لما تسيل روية
تجرف أحلام العيون العايشة جنبك لاشقية
لما ردتك كان عمر قصتنا ساعة
الزمن في لحظة نادى كل أفراحو المضاعة
ماالمودة معاني سامية والأمل للروح مساعة
إنتي ترحلي زي مراكب للوداع فردت شراعا
حومي في خاطر حبيبك كوني في زحمة ظروفو
شعري من بهجة عيونك من حنانك ضي حروفو
دنيا فيها الريدة قسمة وكل زول كايس وليفو
ريدي مكتوب في الجبين بكرة ياما العين تشوفو


كل ما سألت عليك

كل ما سألت عليك صدوني حراسك
ردوا الجواب كافين مع إني من ناسك
ردوا الجواب قالوا كم غيرك إحتالوا
غير صدهم لاشئ مننا نالوا
يا قاسي يا قاسي هل يرضيك ما قالوا
ام إنت ماهاميك ولا حرّك إحساسك
ياغالي ياغالي يالديمة في بالي
جفاك حارمني من لهجك الحالي
أنا في هواك ياجميل إتحطم آمالي
أنا برضي بستناك والصبر يحلالي
كل ما شذاك يسري في قلبي كالسحر
ييقظ لهيب الشوق والهوى العذري
أهواك واداري هواك لو يتقضي عمري
عمري باقي على عطفك وإحساسك أنا


مسافـتك

لامقدور أسيبك ولاعايش معاكي
لا معدود حبيبك ولا عاشق سواكي
أجيكي بكل طيبة وأنا العايزك حبيبة
تجيني بكل ريبة ولاقي عيون غريبة
كأنك ما قريبة
أجيكي بكل حناني واقول جنبك أماني
تجيني بشكل تاني تضيع مني الأماني
وافتش لي رضاكي
معاكي غلبت حيلة مسافتك مستحيلة
ولا الريدة النبيلة ولا العشرة الجميلة
ولا التحنان هداكي
بخاف من بكرة بعدك يالأخلفت وعدك
انا البشقيني بعدك يكون في بعدي سعدك
واعيش محروم هواكي
أكون يالله واهم وفاكر الخوة ريدة
وإنتي نهاكي فاهم ايه معني القصيدة
وأنا الحزنان وباكي

2/ البوم سكت الرباب

خلي العيش حرام

خلي العيش حرام مادام أرى الموت يحل
مابين الرميش فوق للطريف الكحيل
هز صدرو ميل فدع الخصر النحيل
درّاج المقل شبه المهر الوحيل
النوم مني فرّ وقلبي ناوي الرحيل
من غير المنام طيف الخيال مستحيل
ولا لان إشتياقي وقلبي أصبح وجيل
ولا من جمال يرفع لي قدرك يجل
يشتاق الهلال ينصاع لي قدمك حجل
بنخوض الرماح لوكان تزيد أو تقل
ونخاف من ضميراً أهيف منفتل
ونقابل المدافع بالثبات والعقل
ونخاف سيف عيونو إن لمعت يضرب صقل
يالمنك معار تكحل شويدن الخميل
علمت الغصون مع الغصون كيف تميل
مختارك رعاك في عشو ودمعو الهميل
التختارو لي لاشك جميل ياجميل

بسأل عليك

بسأل عليك حزن الشفق
وقت الخيال ينعس ينوم يتوسد أحلام الأفق
ورعشة الليل الطويل آهة الشوق والأرق
بسأل عليك لما السؤال يصبح سفر
بلقاك في فيض الأماني الذايبة في رنة وتر
في لمحة الطيف البعربد مرة بالخاطر عبر
ورعشة الأمل البفوح يتلاشى زي لون السحر
مطوية في حضنو المسير مخفية في صدف البحر
بسأل عليك في زحمة التيه المحاصر بالفراغ
في صحية الوعي المخدر في جبين الكون ضياع
في غربة الشجن المعذب ورهبة الخوف المشاع
بتجيني في وجع الحروف الياسة تشرب من أنينا
في شارة الالم البتكبر الجاية من أغوار دفينة
مكسية بي لون الشفق مشحونة من طرف المدينة
بسأل عليك لاملت أشواقي السؤال
بسأل عليك لا إرتاحت الخطوة الخزينة

سكت الرباب

سكت الرباب قبال يقول غنواتو بي شوق يهمسا
لما النغم الكان بدغدغ فينا إحساس وإتنسى
علمنا أشواق العصافير للمغارب والمساء
ياحليلو عاد حسو الحنين مابقول همسة شفايف
والعيون لغة الاصابع الراعشة ساعة يلمسا
فقدت ليالي الشوق نجيماً زين صفاها وآنسا
أحبابي كيف سآلين عليك
قالوا الرباب ياناس قسى
خلانا لي نار القسى واخوفي من طول الطريق
أمشيهو كيف بين المغارب والمساء
سكت الرباب سكت الرباب


عشان نغني

عشان نغني نسوقا خيلاً للتمني
كوني أنهار العزايم حركي الموج للمغني
وأبدي مني رحلة هوى لافاتا زول لايصلني
تدخل شمس معنى القصايد وندخل الحب والمعاني
نبقي واحد الحدايق للرضا والشوارع للصبا
وزي ما الأصابع متنوعة نبقي إيد تعزف تغني
ونبقي إيد تفرح تغني
ونبقي إيد تفرح تغني
لي فوق يانيل لي فوق هناك
لي فوق ياخيل لي فوق سماك
لي فوق يابلد عشان نغني


شذى الأيام

شذى الأيام لقيتك غنوة من وهج الكلام
طاب القلب يحلم بالمنى رحل الغمام
الفرح الجزيل المدي الأنسام
إبتديت بيكي أعرف شفت وقتاً بيك يصدق
يملأ قلبي يسرح سلام
شفت نهراً شد حيلو بيكي يحلف يالحقيقة يالظلام


فاكرك معاي

أنا فاكرك معايا وين حبيبي فاكرك معاي
تسعد بي سعادتي وتشقى عشان شقاي
أنا فاكرك معاي وانت مع المظاهر
وماراعيت ضنايا وظلمك لي ظاهر

سهرت الليالي سليتني سلبت عودي
باب غفراني فاتح ليك لو عدته عودي
ديمة عشان رضاك انا باذل جهودي
ما راعيت ضناي وبلواي سهودي

تسمع كل واشي قولو عليك يكتر
عدو في توب صديقك اتوارى وتدثر

كل الناس بتغلط ما بحمل عليك
تعال خليني واصل اسفاري في عينيك


3/ كلمات البوم يا عمر

ياعمر

ياعمر خليني انسي والبينسي الريده سيبو
خلي عايش في خيالو بكره ما الايام تجيبو
لا العذر يشفع اليه ولا الندم في يوم بفيدو
ياعمر الفات ودع ماضي ابداً ما بعيده
الزمان ادي الفرح للقليب الما بسيدو
الزمان الداير يصيدنا الزمان باكر بصيدو
لما قسم للشقاوه اداها للناس البريدو
ياما نشقي عشان عيونو لا الفرح كان يوم بايدو
ياعيون حزنانه صبرك مافي زول فايت نصيبو
ياعمر خليها سيره دا الزمان حدد مصيرو
يا عمر ياااااااااااااااااااا

غـدر الزمن

شغل القليب بالشوق على زولاً بحن
طبع الفراق الجوة إحساسي الدفين صورة شجن
زاد الألم سبب الفراق البينا كان غدر الزمن
غدر الزمن مسح الأحاسيس النبيلة وبدلا
عشرة سنين ممزوجة بي أحرف وفاء ما أجملا
عزاي حروف بعد الشقاء مسح الليالي وحولا
سلواي قصايد شاعر إتغرب وزادو بقى الصبر
نعمل شنو إلا الحصل بيناتنا ما نفذ القدر
يرجع يعاودني الحنين خاطري إنكسر يوم إنجبر



الحبيب

الحبيب مالو ما جاء وين مالو ما جاء
إنتظرتو لما ما جاء رحت زرتو
ياعوازلي إنتو جرتو كان عرفتو كان عزرتو

خدو صفقة جوا قلبي ليهو شفقة
الحنان العندو صدقة الدلال الظبية سبقا
حبي عرفو والأذاني سببو طرفو
ياعوازلي إنتو جرتو كان عرفتو كان عزرتو
حبي عرفو والأذاني سببو طرفو
ليهو القلوب بوالفو والبوالفو ما بخالفو

الحنان الزي حنانو شوفو لي وين مكانو
الجمال في الدنيا زانو ده بتروح الروح عشانو


الحنين

الحنين البي ليه ما قدرو
العمر من وين بيشترو
ضوق وقاسي الوحدة ياقلبي الرهيف
ياوليف الشوق بقيت فاقد الوليف
أن نساني وباع خلاص حبي الشريف
الكلام البينا كيفن ينكرو
الحنين البي من قلبي الأمين
من مشاعرو السامية والريد الدفين
الحنين البي لو طالت سنين
ما بتمر بي خاطري لحظة تودرو
ويا زمان العشرة وين طيبة القلوب و
وين أماني عمرنا والريد الطروب
المحبة البينا لو كانت ذنوب
الذنب في الريدة ليه ما يغفرو


بعد الفراق

بعد الفراق ما عدت تاني تهمنا
أيه الحصل تكتب جواب مضمونو انت تزمنا
ما قلت في ساعة الوداع مافي أمل حيلمنا
اخترت انت طريق طويل سكتنا ما زي سكتك
لبس المظاهر والغرور في نص الطريق بنزلك
أيه الحصل تكتب جواب عايزنا نحن نقدرك
ما قلت في ساعة الوداع انت النجوم وايدينا ما بتحصلك
نحنا ما درنا الفراق والله ما درنا الفراق البيهو جيت فاجأتنا
عايشين على ريدك سنين في لحظة جيت بس خنتنا
أيه الحصل تكتب جواب طالب نواصل ودنا
ماقلت في ساعة الوداع مافي أمل بيلمنا




جاهل وديع

جاهل وديع مغرور في أحلام صباهو
نايم خلي ومسرور ماعرف الهوى
في سور وداخل سور في روضة زهورغناء وقصور في قصور
آية الجمال مبصور أخلاق الرضيع في هيبة المنصور
باهي الدلال موفور محجور الخدود ماهو الخليع وسفور
زاد في نفور نفور أصبح قلبي في أيدو اليمين عصفور
لو ينفع المحزون مالي ومال هواهو الضامر المبزول
قاسي ومنيع ما بزور لكن دابو تاه جاهل صغير معزور
هل الهلال في حجور وتقلد نجوم لافي إعتزار في جور
مابرحم المهجور مأسور الجمال مابرضى حكم الجور
ناعم لواحظ حور قاروط لو رآه مثلي كان مسحور
فاق الحسان الحور في خدو الزهور زاهية وجوارا بحور




حبك ياجميل

حبك حبك ياجميل ساهر بي والدنيا ليل
حبك حبك ياجميل ساهر بي في ليل طويل
الليل مابنومو وبترقب عدد النجوم
يالفي خاطري دوام مرسوم وما بقدر على بعدو يوم
جنني في ليل لطويل

داخل قلبي أنا لي حبيب وبتألم كل ما يغيب
يا جراحي الما ليك طبيب أملي معلق كيف تجي
ساهر بي في ليل طويل

حبيب القلب ساب نسي حسنو بديع بدع المساء
ياجراحي كيف ألمسا الألامي كيف الامسا
يا جراحي كيف المسا عيني كيفن أحنسا
جنني في ليل طويل
[b]

همسة

عدد المساهمات: 3
تاريخ التسجيل: 03/12/2010

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: كلمات اغاني محمود عبد العزيز

مُساهمة  همسة في الثلاثاء يناير 11, 2011 12:34 pm

البوم أكتبي لي
قسم منامي

ساهر بي قسم منامي
في قلبي أتوسد ألامي
شلت الليل خاطر عيونه
ما ساهر بي ما شال الليل
زولي الكان سعدي ومرامي
دا الساهر بي قسم منامي

ذوبني بسحره وعيونو
خلاني أنظم في فنونو
يا قلبي أصابك جنونو
ما صان هواي بس كيف تصونوا
يا قلبي ما بتسمع كلامي

قال لي حبيب حاني وأحنا
لا فيهو ريبة ولا مظنا
يا نسمة يا سلسال في جنا
يرويني من نبعو المحنا
لكنو جار بدل غرامي
بدل غرامي قسم منامي

ذوبني بسحره وعيونو
خلاني أنظم في فنونو
يا قلبي أصابك جنونو
ما صان هواي بس كيف تصونوا
يا قلبي ما بتسمع كلامي

قال لي حبيب حاني وأحنا
لا فيهو ريبة ولا مظنا
يا نسمة يا سلسال في جنا
يرويني من نبعو المحنا
لكنو جار بدل غرامي
بدل غرامي قسم منامي
ساهر بي قسم منامي ...



شقاك أزاك

شقاك أزاك
أزاك شقاك
أزاك جزاك
شقاك ازاك
أزاك جزاك
شقاك أزاك يا عيني
شقا جتيه لي
شقاك أزاك يا عيني شقا درتيه لي
-----------------
ليه بتميلي ليهو
الما بتقدري عليهو
نسيتهو ترسي
ولا بتجي راجعة بيهو
-------------------
ويضيع أنا ليه شبابي
الزول القلبي حابي
يسهرك الليالي الليالي
تقبلي كيف عذابي
شقاك أزاك ....
-------------------
منك يومي باكي
حاير ساهي شاكي
منك يومي باكي
حاير قلبي شاكي
من الأطرا وجدي
من غيرك وبراكي
شقاك أزاك...
-------------------
خبر ما بسرك
وشاعرابو في سرك
فراق الزول وهجرو
أسباب البلية
شقا درتي ليا .. شقاك أزاك...
-------------------
ضحيت بشبابي
فراقه دق بابي
قصدت الجنة مرة
لقيت نيرانا حية
شقي درتي ليا...
شقاك أزاك ....
أزاك جزاك
شقاك جزاك
أزاك شقاك ....


حنيني اليك

حنينى اليك وليل الغربة اضنانى
وطيف ذكراك بدمع القلب بكانى
وأقول ياريت زمانى الفات يعود تانى
القاك يا حبيب عمرى وتلقانى
القاك يا وحيد عمرى وتلقانى
تلقى الريد معاي لحظة مانسيتك ولا نسانى
ومابنساك ومابقدر ولا عايز بعد حبك احب تانى
حنيني اليك ....

بهرب من خيال طيفك فى عيني بلاقيه
و اعيش ايامى بالذكرى
الم افراح اعيش بيه
متين الليل يصافينى
ونعود تانى تانى تانى من تانى
القاك ياوحيد عمرى وتلقانى

تلقى الريد معاي لحظة مانسيتك ولا نسانى
ومابنساك ومابقدر ولا عايز بعد حبك احب تاني




بحسك

اه بحسك فرحة في جواي
أه عرفتك وأنت كنت معاي
كل ما أتوه بلاقيك في العمر سلوى

اه لا لا لا للاااا لررلل لا

اه جبينك بسمة من النور
ويبرق محيك الضواي
واتمناك متين ألقالك
والقى هناي وأغني غناي وماني براي
بريدك بريدك بريدك بريدك
يا صباح العيد ويااا طلة قمر في سماي
كنت معاي .... كل ما أتوه بلاقيك في العمر سلوى
اه لا لا لا للاااا لررلل لا

اه بترحلي أنت من دنياي
منو البعدك بقاسم الليل اه
سهاده معااااااي
قدر مكتبوب
طريق مسدود
أواصل لنهايته براي
كنت معاي .... كل ما أتوه بلاقيك في العمر سلوى


ماتبكي يا عيوني

خلاص ما تبكي يا عيوني
كفاك ما تبكي يا عيوني ...

كفاك يا عيوني ما تبكي
والجفاك ما تسكي
ما تألمي وتشكي
الساب الحنان فكي
حقيقة الريده بتبكي

خلاص ما تبكي ياعيوني
أتاريهم نسو الريد ونسوها وحتى نسوني ..

كفاك يا عيوني ما تعبتي ...
حتي الليل دا غلبتي
أه يا ياعيوني ما تعبتي
حتى الليل دا ساهرتي
منو نهلتي وشربتي ...
سابك وما حصل سبتي

خلاص ما تبكي ياعيوني
كفاك ما تبكي يا عيوني
أتاريهم نسو الريد ونسوها وحتى نسوني ..


قنوعة

بتريدني موت وبريدا
قنوعة بالزول البريدا..
بتريدني موت وبريدا
مقتنعة بالزول البريدا

قالت لي تعال أبوي
حتما آكيد بديك
لو جاء وسألني عليك
حاقول كلام يرضيه
كل همه يسعدني
شرفني أسعدني
أنت بتجيب والديك
طالبين يدي لايديك
قنوعة..
بتريدني وموت بريدا ....

راحة الضمير والبال
يا سيدي بالأقسام
كونك فقير عدمان
ما عيب ولاهو حرام ...
منك كتير الحب
المنيا والأحلام
تحيا وتعيش وتجيب
ما دايرة منك غيث
قنوعة ...
بتريدني وموت بريدا ...

كن ممطئن حيكون
بأذنه كلف الخير
خلي الامور لله
يا لي صباح الخير
يكفيني منك ريد
والفاتحة قولة خير
تحيا وتعيش وتجيب
ما دايرة منك غيث
قنوعة ..
بتريدني وموت بريدا ..


أكتبي لي

أكتبي لي وطمنيني عليكي
قولي يا بنية
أكتب لي وطمنيني عليكي
أحكي يا بنية

لاخبر لا جواب
أيه حاصل ليه مالك
عاملة كيف والناس
في الغربة كيف حالك

قلبي زاد خوفه
بالهيام زايدي
حاني لوصالك
أكتبي لي ....

و كيف شعور الناس
في الغربة كيف عاملة
كيف بمر اليوم والعيون آملة
زادن العوده و وحشة ألاوطان
عودي يا حالمة
أكتبي لي ....

كل زول بشتاق لبلده وأحبابه
عندو فيها حبيب راجي واصحابه
كل زول بشتاق لبلده وأحبابه
عندو فيها حبيب راجي أحبابه
كل ليل حاضن الوسادة الطيف
ينوم و يصحابو

أكتبي لي .....

20/ البوم عامل كيف
عـــامـــل كـــيــف

عامل كيف .. كامل كيف .. يا الخضرتا مواسم ريدى
الكانت قبلك آآه كلها صيف

يا تحنان الريد الاول قول لى حبى الغايب الطول
أ نا عن ريدك ما بتحول .. لو دقات القلب تقيف
عـــامل كـــــــــيف

خلى عهودك زى ما هى .. كدة على طول بتزيد حنية
بس لو تشفق مرة على ... وتبقى الدنيا بى لون الطيف
عااااااامل كيف

عامل كيف .. كامل كيف .. يا الخضرتا مواسم ريدى
الكانت قبلك آآه كلها صيف


سلام الجفا

سيب سلام الجفا .. حبيبى تعال
من عنادك كفا .. حبيبى تعال

لى ريدك جيبو .. انت قلبى نصيبو
باقى ليهو حبيبو .. حبيبى تعال
الريد بلاك ما بزيدو .. حبيبى تعال
سيب سلام الجفا .. حبيبى تعال
من عنادك كفا .. حبيبى تعال

يا حياتى وروحى .. يا شرافت لوحى
من سهادى ونوحى .. حبيبى تعال
تعال وداوى جروحى .. حبيبى تعال
سيب سلام الجفا .. حبيبى تعال
من عنادك كفا .. حبيبى تعال

فكرتك فى بالى .. يا العزيز الغالى
الحسود مد بالى .. حبيبى تعال
تعال وكيد عزالى
سيب سلام الجفا .. حبيبى تعال
من عنادك كفا .. حبيبى تعال






دروب الشـــــــــــــــــــوق



دروب الشوق لمتين تودينا
مخلاص تهنا وضاعت امانينا
كم مره اوعدنا وخلف مواعيدو
كم مره حاولنا ننسي
ونسيب ريدو
لكن بدون نشعر
تلقانا بنريدو
مكتوب علينا هواهو
ومصيرنا في ايدوو
جنيت علي ياقلبي ورميتني
في حبو
انت عارفو زول قاسي
وزي الحجر قلبو
انت عارفو زول قاسي وما بحن ليك قلبو
الناس كثير رادوهو
ما اتهنو في قربو
والله احسن ليك تنسي وتفك دربو




كتر في المحبة


كتر في المحبة زيد الريدة حبة

نحنا اتنين أحبة وإلا الشوق مخبا

من قمنا وربينا والشوق سامي بينا

جمعتنا العواطف وأخضرت سنينا

لو تعرف يا ظالم هواك هو الباقي لينا

ما دام انت راضي تاني ولا علينا

وكتر في المحبة وزيد الريدة حبة

نحنا اتنين أحبة وإلا الشوق مخبا

خلي الناس في حالة ما تسمع قوالا

يا سيد اللطافة ريدتك ليهم محالة

صايباني العيون ورامياني بنبالة

بريدك وانت ريدني الناس زعلانة مالة

لو فاكر حبيبك ما تطول بعادك

أسأل كل عاشق مين الزيي رادك

يا سيد اللطافة أبقى على ميعادك

وكتر في المحبة وكتر في ودادك

وكتر في المحبة وزيد الريدة حبة

كتر في المحبة



طروني ليك


طرونى ليك انا كنت قايل اصلى مابطراك تانى

كنت فاكر طول فراقك يمحو ريدك من زمانى

الا تارى البينا للسع مانسيتو ولا نسانى

فجاء اتذكرتو ريدنا والزمان الكان معاكا

والمشاوير والامانى والفرح ساعات لقاكا

حتى قلبى القال نساكا مالو زى المانساكا

صحى جرح الماضى تانى من جديد هسع بكاكا
الا تارى البينا للسع مانسيتو ولا نسانى

طرونى ليك من تانى اندم زى كانى كنت ظالم

لمت نفسى وقلت ياريت لو الظروف بتلمنا تانى

طرونى ليك انا كيف ظلمتك

لم جيت غلطان وراجع طرونى ليك

طرونى ليك انا كنت قايل اصلى مابطراك تانى

كنت فاكر طول فراقك يمحو ريدك من زمانى






دمعي جاري

أنا دمعي جاري وأسبابي جاري
يا ريته يعلم بي البي جاري
أ ه دمعي جاري وأسبابي جاري
يا ريته يعلم بي البي جاري

في قلبي ساكن جاري البعزو
هاجرني لكن آسرني حبه
يا ريت يدري الام محبه
يسعفني حالاً قبال وداري

جاري البعزو الطلة سابا
كل ما طريتو أزداد صبابا
يا ريت ديارنا جا ودق بابا
يمسح دموعي ويطفيها ناري
أ ه دمعي جاري

مهما جفاني ما بهوى غيره
من لون سماره الناس بغيره
لو مر طل أو فاح عبيره
أشواقي تفرح ويزداد حساري

أ ه دمعي جاري وأسبابي جاري
يا ريته يعلم بي البي جاري
يا ريته يعلم بي البي جاري







البي ما حاسي

البي ما حاسي
مالك بقيت قاسي
وين حنانك لي أنا
وين رحت يا ناسي

دسيت كلام الريد وما بحتو صرحت
قلبي البريد عينيك جد ليهو حرحت
رغم المحنة الفيو بالريدة ما بحت لا لا
لا قدرت أنسى هواك لا منو أرتحت
دسيت كلام الريد وما بحتو صرحت
لا قدرت أنسى هواك لا منو أرتحت
رغم المحنة الفيو بالريدة ما بحت لا لا
لا قدرت أنسى هواك لا منو أرتحت
البي ما حاسي ........

يا الزدت في هجري وناسي البدينا زمان
أجمل غيم عذري قلبك نساه وخان
قاسي الزمن نساك ما خلى فيك حنان
نسيت معاني الريد والطيبة في الأنسان
البي ما حاسي ..........


امي
أيا يا أمي معقول تجافيني
خليني نفند كدي نلقا مراد قلبي
انا كان تعرفي رايي نسوي التدوري
كلام ما بحقك انا خاطي بس نتري
اسمعي كلام قلبي وبيت الحنان



همسة

عدد المساهمات: 3
تاريخ التسجيل: 03/12/2010

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة

- مواضيع مماثلة

صلاحيات هذا المنتدى:
لاتستطيع الرد على المواضيع في هذا المنتدى